هو ليه الناس بتهرب من الجيش ؟؟

زمان كنت دايما بفكر ,, ليه الناس بتفرح لما بياخدو اعفاء من الجيش !! يعني المفروض هم كده مش عايزين يخدمو بلدهم الخدمة العسكرية ,, يعني اسرائيل هتحتلنا كده ومش هتلاقي جيش يدافع عننا ,, وهنبقى بنتضرب عادي كده !
لحد ما جه الكومسيون الطبي بتاع علاء ولي الدين وخلاه يدخل الجيش غصب واقتدار ,, ايه ده طب دول مش ف حرب بس بيعذبوهم وبيخلوهم يقولو "صاعقة" ,, ساعتها عرفت ان الناس بتهرب من الجيش وتقعد تتمنى انهم ميدخلوش الجيش عشان ميعيشوش العيشة المرة دي ,, كبرت شوية عرفت ان فيه ناس بتتسك 3 سنين ف وقت ان فيه ناس سنة واحده بس .. كل ده مش مهم ,,اصل الواحد لسة على ما يتخرج ويقعد على القهوة عاطل وكمان يدخل الجيش ,, طيب هيكون نفسه ازاي يعني ,, كل ده مش مهم ,, برضه لسة سؤالي متجاوبش ,, هم ليه مش عايزين يقدمو الخدمة العسكرية لبلدهم ,, الله مش مصر دي بلدنا يعني المفروض نبقى خايفين عليها وعايزين نتعلم فنون القتال عشان محدش يحتلنا ؟؟
كبرت عرفت ان اسرائيل مش هتحتلنا عشان بنطاطي ليها ,, يبقى ليه نتعلم فنون القتال طالما بنعرف نطاطي ؟؟
سمعت ناس بتتكلم ,, مش هنسلم مش هنبيع مش هنوافق عالتطبيع ,, تطبيع ؟؟ يعني ايه تطبيع ؟؟ مش فاهمة . اه يعني ناخد وندي معاهم طيب مش عايزين نطبع دول بيقتلو الفلسطينين ,, ازاي احنا ساكتينلهم ؟؟ ازاي مات قبل كده الدرة وغيره وغيره واحنا ساكتين ,, ايه ده بس الناس مش بتموت مقتولة ف فلسطين بس ,, دول هنا كمان بيموتوا مقتولين جوع ,, مقتولين عطش ,, مقتولين من النومة ف الشارع ,, ابن الجيران كان ميكانيكي ,, حرام على اهله انهم يشغلوه ميكانيكي ,, بس ازاي اصل فين التعليم ف بلدنا ,, الناس اتقتلت من المصاريف ,, لازم نفوق ,, قام ربيع عربي ,, ثار الناس ضد الفساد ثارو ,, وشالوه ,, بس ثانية ايه ده الجيش اهو حمانا ووقف جمبنا , طيب ليه الناس مش عايزة تدخل الجيش ؟؟؟؟؟ لييييييييه حد يقولي لييه ,,,,
فوقت تاني من سؤالي بصيت كده لقيت اطفال بيموتو ف سوريا ,, حرام عليكم ليه مش بنتكلم ليه ساكتين ؟؟؟ اصل مش معقول اخدنا حريتا او شبه حريتنا ومش عارفين ندافع عن ثورات قدمناها للعالم ,, اصل ثورتنا دي مش عشانا بس ,, اصل زمان وانا صغيره عرفت ان احنا مش هنحرر فلسطين غير لما نبقى كلنا ايد واحدة ؟؟ انا مش شايفة غير ان احنا بنتشتت مش بنضم ايدينا لبعض ؟؟ وبرضه لسة سؤالي ؟؟ ليه الناس بتهرب من الجيش ماهو لما هيدخلو الجيش هيروحو فلسطين ويموتو الاسرائيلين ,, طيب لما هيدخلو الجيش هيساعدو سوريا مش هنقف نبكي على اطلالهم بس ,, بس ايه ده ثانية ,, مش اللي ماتو ف بورسعيد ,, كان الجيش بيحكمنا ,, مش اللي ماتو ف محمد محمود برضه الجيش بيحكمنا ,, وغيره وغيره ,, ازاي جيشنا مش قادر يحمينا ؟؟ ايه ده هو اللي بيضرب فينا
ده مش احنا بس حتى ف سوريا ,, الجيش بيضرب ف الناس برضه ,, هم مش واخدين بالهم ,, احنا مش اسرائيل المفروض احنا اللي تدافعو عنهم ,, هو فيه ايه ؟؟ هم الناس ليه بيهربو منكم ليييه
عرفت الرد على سؤالي دلوقتي ,, اخويا الثورجي هينزل يثور ,, اخويا التاني هيدخل الجيش ,, وامي !! وانا هندعي ربنا ميقتلوش بعض !!ئ