1- الحقيقة المرة
يااااااااه أخيرا بقى خلصت ثانوية عامة
وهنخلص بقى من الهم ده ,, مفيش بعد كده اصحى الصبح بدري عشان البس يونيفورم عشان
انزل استنى الباص عشان اروح المدرسة وافضل
7 حصص كده ما بين الصحيان والنعاس بقى ومش هعمل واجبات تاني ومفيش ضرب
ومفيييش حاجات كتييييييييير ,, اهلا بقى بعالم التحرر ,, اخيرا جبت المجموع اللي
بحلم بيه ,, وهدخل الكلية اللي انا عايزاها " الصيدلة " ,, اخيرا هرجع
مصر واعيش فيها " أصل مصر دي أم الدنيا "
كنت بقالي 4 سنين في الغربة برسم لنفسي حلم
عايشة عليه اني ادخل الكلية اللي انا حاباها واني انزل اعيش في مصر اصلي مكنتش
مصدقة ان اللي بيتقال عليها صح مكنتش مصدقة ان العيشة في مصر مش كويسة وكنت
مستغربة ليه الناس عايزة تهج اوي كده من البلد
أول ما نزلت مصر كانت أول صدمة تقابلني هي
صدمة التنسيق , قالولنا ان احنا تنسيقنا بيكون اخر حاجة كده بعد ما كل المصريين
يخلصوا تنسيقهم يشوفولنا الأماكن الفاضية ، قلت مش مشكلة انا واثييييق من الفوز
وبرضه هحقق حلمي ، وعدت الايام بقى لحد ما ظهرت نتيجة التنسيق ، " ايه ده انا
مجاتليش صيدلة " انا جاتلي هندسة لا لا لا لا لا اكيد بيهزروا اكييد ,, مع
مرور الوقت بدأت اتعود خلاص ان انا مش هبقى دكتورة صيدلانية لا انا هبقى مهندسة
وبدأت اسستم نفسي على كده بمبدأ " حب ما تعمل حتى تعمل ما تحب "
واللي صدمني اكتر , ان قلة قليلة فقط من اللي
اعرفهم دخلو الكليات اللي هم فعلا حابينها وعايزينها , يللا الحمد لله , الأزمن
الأكبر بقى , ان برضه لقيت بقى ان الناس بقو يدخلوها أقاليم وبعيده عن محل اقامتهم
, وطبعا المغتربين لازم يدفعوا دم قلبهم عشان يحولوا لمكان قريب منهم " مش
عارفة ليه فاكرينهم راجعين وفي جيوبهم بترول مثلا " , مش مشكلة الحمد لله ,
انا كده خلاص بقيت مصرية مية مية وهبدأ دراسة بس متأخر شوية , عشان التحويلات وكده
، اما اروح ادفع المصاريف كده .. " اييييييييييييه " ده كان انطباعي اول
ما عرفت ان انا لازم ادفع مصاريف 10 أضعاف اللي بيدفعها الطالب العادي . يللا
الحمد لله بس بصراحة مسامحتش فيهم , ايه التخبيط ده من اول ما نزلت ,,
ياترى الصورة اللي كنت راسماها في خيالي هتتهد
كده مرة واحدة , ياترى يا مصر لسة فيكي حاجات حلوة ,,
يللا استعنا على الشقى بالله .. نبدأ أول يوم
في هندسة ............
يتبع ... ان شاء الله :)
