1/1/2009

خلص دفتر 2008 وهنبدأ في دفتر جديد كله أوراقه بيضه صافية مش متسطرة وهنبدأ كتابة بقلم رصاص عشان كل اللي يدايقنا لو كتبناه نرجع نمسحه من عالكراس ومن على قلوبنا ....ومن عقولنا هنحاول نعيش في حالة زهايمر بس لكل اللي يزعلنا ... وقلوبنا هنخليها بيييضه زي الورد مش هنزعل ومش هنتقمص ... 2009 هنبدأ سنة جديده وبدايتها كنا فاكرين انها هتكون حلوة لكن للأسف بدأت بحصار غزة الى آخره... اللي انا مستغرباله اني لحد دلوقتي مش مصدقة ان 2005 خلص ف ازاي دخلنا على 2009 بالسرعة دي.. يااااه السنين بتجري بسرعة ولازم الواحد يجري وراها يا اما يلحقها ويتشعلق يا اما تفرمه تحت رجليها .....حياتنا دي زي السكة الحديد .. فيها القطر بيعدي .. ويعدي كل يوم جديد .. لكن عمره ما يهدي.... عامة آدي سنة جديدة هتيجي هنسيب القديم ونفكر في الجديد هنعيش ولاد اللحظة مفيش ماضي ومفيش مستقبل .... احنا ولاد الحااضر تفكيراتنا كلها هتتغير هنعيد تخطيط الجمل من جديد وهنعمل جدول لحياتنا .. جدول كل أيامه يوم 1/1/2009 لحد ما تيجي 2010 ساعتها هيتغير تاريخ الجدول بس....وفي النهاية أوجه رساله لسنة 2008 :...مع السلاامة والقلب داعيلك، ومتنسيش انك في آخر أيامك اتأذى فيكي الكتير بس احنا قلوبنا صافية هنقول مش مشكلة .... مع السلااااامة وهنبدأ السنة الجديدة بابتسامة هتكون ليها معاني كتيرة.. ابتسامة أمل...ابتسامة خوف... ابتسامة فرح ... ابتسامة حزن ... ابتسامة جنووون ... ابتسامة حريــــــــــــة.......